Imodoka ikora amasiganwa yakoreye impanuka ikomeye mu nkambi ya gisirikare muri Sri Lanka, abantu 21 barakomereka abandi 7 bahasiga ubuzima.
Iyi mpanuka yabaye ku Cyumweru taliki 21 Mata 2024, mu irushanwa rya Fox Hill Supercross ribera i Diyatalawa mu nkambi ya gisirikare.
Abapfuye barimo umukobwa w’imyaka umunani y’amavuko n’abayobozi bane b’iryo rushanwa nk’uko byatangajwe n’Ingabo.
Amakuru y’ibanze yerekana ko uwari utwaye iyo modoka ntacyo yabaye, ndetse ngo ashobora gukurikiranwa n’Inkiko.
Iperereza ryimbitse kuri iyo mpanuka yabereye mu nkambi ya gisirikare ryahise ritangizwa nk’uko ubuyobozi bwa Polisi bwabitangaje.
Nihal Talduwa, Umuvugizi wa Polisi, yabwiye BBC ko iyo modoka yarenze umuhanda yagombaga kunyuramo, aho byatumye igonga benshi mu bari aho.
Yagize ati: “Iyi mpanuka yabaye igihe imodoka yasimbukaga ikava mu nzira yari gucamo.”
Abatangabuhamya bo bavuze ko iyi mpanuka yabaye nyuma gato y’uko indi modoka iguye mu muhanda yari iri gucamo muri iryo rushanwa.
Amakuru ubuyobozi bwatangaje avuga ko abantu batanu bapfiriye muri iyo mpanuka, abandi babiri bapfira kwa muganga.
Iri rushanwa rya Fox Hill Supercross ritegurwa n’ishyirahamwe ry’uyu mukino muri Sri Lanka.
