Ubuzima bw’abaturage b’Uburundi bukomeje kujya mu kaga kubera gusenyerwa n’umwuzure watewe n’imvura ikomeye yaguye muri iki gihugu.
Iyi mvura yatumye ikiyaga cya Tanganyika cyuzura kiramena, amazi asendera mu ngo z’abaturiye iki kiyaga, anangiza byinshi.
Uyu mwuzure wangije ikiraro cya Bujumbura, ahafatwa nk’isoko ya kabiri y’ubukungu mu Burundi.
Prof. Jean Marie Subushimike, ni impuguke mu mihindagurikire y’ikirere, akaba n’umwarimu w’ubumenyi bw’Isi muri kaminuza y’Uburundi, avuga ko ibi nta gikuba cyacitse cyane ko isi yose iri mu gihe cy’imvura, kandi abona ntacyo byahungabanyije ku bukungu.
Akomeza avuga ko iyo imvura iguye ubukana bwayo bubonekera mu myuzure, kandi aho batiteganyirije neza bibagiraho ingaruka.
Umuryango w’Abibumbye uvuga ko guhera mu kwezi kwa cyenda umwaka ushize abantu bagera ku bihumbi 200, bamaze kwimurwa n’umwuzure.
Abo umwuzure yatumye bahunga ubu ngo babayeho nabi, aho inyubako zabo zamaze gusenywa n’imyuzure, bigatuma ubuzima bwabo buhungabana.
“Kuva umwaka ushize imvura n’imyuzure byafashe indi ntera hano. Byatangiye gahoro gahoro amazi aza mu mirima, gusa kugeza ubu bimaze kurenga urugero. Ibintu nkibi ntabwo twigeze tubibona.” Joakim Ntirampeba, uwagizweho ingaruka n’imyuzure.
Ubu abagira neza nibo barimo kugerageza gukusanya inkunga yo gufasha abagizweho ingaruka n’ibiza.
