Kuri uyu wa Gatandatu tariki ya 27 Mata 2024 hirya no hino mu gihugu hatangiye icyiciro cya mbere cy’amasomo y’abarimu batize uburezi.
Umuyobozi w’ishami rishinzwe iterambere n’imicungire ya mwarimu Bwana Leo MUGENZI NTAWUKURIRYAYO yasuye abarimu bari kwigira mu bigo bitandukanye byo mu Karere ka Nyagatare bitabiriye gahunda idasanzwe ku barimu badafite impamyabumenyi mu burezi bigisha mu mashuri y’incuke n’abanza.
Aganira n’abarimu, Leo MUGENZI NTAWUKURIRYAYO yagize ati: “Gahunda idasanzwe yateguwe kandi itangwa na REB mu rwego rwo gukemura ikibazo kidasanzwe kugira ngo abarimu bose babe batyaye kandi bafite ubumenyi bw’ibanze bwo kwigisha kugirango babashe kwitwara neza mu mashuri bigisha.”
Iyi gahunda idasanzwe igamije gutanga imyamyabushobozi z’uburezi ku barimu batabifitiye ubumenyi mu mashuri y’incuke n’abanza mu Rwanda.
Biteganyijwe ko iki cyiciro cya mbere gitangirwa n’abarimu ibihumbi 12, kikazarangira mu Kuboza 2024, naho abandi ibihumbi 12 bakazatangira umwaka utaha.
