Mu gihe kugongana kw’ibinyabiziga gukunze kubera ku butaka, muri Kenya, haravugwa impanuka itangaje aho indege ebyiri zagonganiye mu kirere.
Ikigo gishinzwe indege za gisivili, KCAA, (Kenyan Civil Aviation Authority), cyemeje uku kugongana, aho imwe yari itwaye abagenzi.
Iyi mpanuka yabaye kuri uyu wa Kabiri taliki 05 Werurwe 2024, saa yine za mu gitondo i Nairobi muri Kenya. Indege zagonganye ni indege ya Safarilink yitwa Dash 8, itwara abagenzi, yagonganye n’indege yo kwigiraho ya Cessna 172, bikaba byabaye nyuma gato yo guhaguruka ku kibuga cya Willson Airport.
Ku rubuga, X, rwahoze ari tweeter, iki kigo cy’indege za Gisivili, KCAA, yatangaje ko ubu harimo gukorwa iperereza ngo hamenyekane imvano y’iyi mpanuka.
Indege ya Safarilink, Dash 8, yari itwaye abagenzi 39 n’abakozi batanu, yerekeza i Diani, indi ndege yo ni indege isanzwe yifashishwa mu myitozo y’abapilote y’ikigo, Ninety Nines Pilotes Academy.
N’ubwo hataratangazwa niba hari uwaba yakomerekeye muri iyi mpanuka cyangwa uwayiburiyemo ubuzima.
