Abanyarwanda barasabwa n’Ikigo cy’Igihugu gishinzwe ubuzima (RBC), kwirinda ibihuha biri gucicikana ku mbuga nkoranyambaga bivuga ko icyorezo cya Covid-19 cyagarutse, ahanini bishingiye ku biherutse gusakara bivuga ko mu Ntara y’Iburengerazuba hapimwe abantu benshi bikagaragara ko icyo cyorezo gihari.
RBC ivuga ko nta muntu urwariye kwa muganga cyangwa mu rugo icyorezo cya Covid-19, kandi ivuga ko nta bikorwa byo kurwanya Covid-19 biri mu gihugu gusa ivuga ko umuntu ushaka kwipimisha iki cyorezo ku bushake bwe yakegera ku Kigo Nderabuzima bakamupima.
Julien Mahoro Niyingabira, Umuvugizi wa Minisiteri y’Ubuzuma, avuga ko nibura mu Rwanda abantu bose bagejeje igihe cyo gukingirwa Covid-19 bahawe inkingo, ndetse zirimo n’izo gutsindagira.
Yagiraga ati: “Imibare itwereka ko abahawe inkingo za Covid-19 ari hafi 100%, dufite uburyo bwo kugenzura niba hari ubwandu bushya bwakwaduka, kandi ntabwo turabona. Dufite ibicurane byinshi ariko n’ubwo umuganga ashobora kukwandikira imiti, ubundi nyuma y’icyumweru ubirwaye umubire we uba wamaze kwirukana iyo Virusi.”
Avuga ko bahora bacungira hafi ko hari ubwandu bushya bwa Covid-19 bwakwaduka (New Covid-19 Variant), kandi ko itaragaragara , agasaba abantu kwirinda ibihuha bishingiye ku kuba hari ibicurane byinshi mu baturage.
Ati: “Ibicurane biriho kuko bigendanye n’igihe turimo, umuntu ashobora kumva ababara mu ngingo, gukorora, kuribwa umutwe nk’ibimenyetso bitoroshye, ariko ntabwo ari ubwoko bushya bw’ibicurane nta n’ubwo umuntu yavuga ko ari Covid-19.”
Akomeza avuga ko mu kwezi ku Ukuboza na Mutarama hakunze kugaragara ibicurane byinshi, ariko avuga ko uwumva afite ibimenyetso bya Covid-19 yajya kwa muganga bakamufasha.
Agira ati: “Igihe cyose umuntu yumva afite ibimenyetso ashobora kujya kwa muganga, kwivuza uko yaba arwaye kose. Ntawe ukwiye kuba yibaza byinshi kuko ni twe dutangaza niba hari icyorezo runaka.”
Avuga ko ku kuba hari ingamba zafatwa ngo abantu birinde kwanduzanya ibicurane, RBC nta mabwiriza yatanze, ku kuba abantu bahitamo kwambara agapfukamunwa, n’ubundi ntikagenewe kurwanya Covid-19 gusa.
Ati: “Nta cyaba gihari abantu ni bo bagikurura, nta Covid-19 ihari, nta makuru na make yatugaragariza ko dufite ubwandu bushya cyangwa kuba twaba dufite abarwayi barenze urugero, ubuvuzi nabwo burahari. Iki ni igihe kigaragaramo ibicurane, nta cyorezo dufite. Haramutse habaye ibisa n’ibyo bavuga twashyira itangazo hanze, kandi bene ayo makuru aturuka gusa mu nzego zibishinzwe.”
Ibicurane byiganje hirya no hino mu gihugu aho umuntu ababara umutwe kandi afite n’umuriro akaba yanacika intege. Ndetse byagaragaye mu Karere ka Ruhango aho abanyeshuri basaga 70 barwariye rimwe bakajyanwa kwa muganga bapimwa bagasanga nta Covid-19 bafite, icyo gihe bahawe imiti barataha.
