Nshimiyimana Vianney alias Aman wo mu Karere ka Nyanza yafatiwe mu cyuho yiba ihene ashaka kwirwanaho atema abaturage, baramukubita ahasiga ubuzima.
Ibi byabaye ahagana saa kumi n’imwe z’igitondo cyo kuri uyu wa 08 Mutarama 2023, bibera mu Murenge wa Kigoma mu Kagari ka Butatsinda ho mu Mudugudu wa Marongi.
Nshimiyimana na bagenzi be, ihene bari bagiye kwiba ni iza Kabanda Appolinaire usanzwe utaba mu rugo kuko akora mu Mujyi wa Kigali.
Mukanyandwi Florida umugore wa Kabanda yumvise bacukura inzu, avuze induru abaturanyi baratabara.
Abandi bari kumwe na Nshimiyimana ntibabashije kumenyekana kuko bahise biruka, uwishwe we yahasigaye ashaka kurwanya abari batabaye kuko yari afite umuhoro, baramukubita kugeza apfuye.
Umuseke dukesha iyi nkuru wamenye ko uyu Kabanda yigeze kwibwa ihene imwe mu Ugushyingo 2023, nanone bacukuye inzu.
Ubwo iyi nkuru yakorwaga umurambo wa nyakwigendera wari ukuri aho ibi byose byabereye.
Ubwo umunyamakuru w’Ikinyamakuru Umuseke yageragezaga kuvugisha Umuyobozi w’Akarere ntibyakunze kugeza iyi nkuru itangajwe.
