Muri Repubulika Iharanira Demokarasi ya Congo mu Ntara ya Kivu y’Amajyepfo haraturuka amakuru avuga ko abasirikare ba M23 bishe Umusirikare Mukuru wo mu ngabo za FARDC witwa Colonel Alex Rugabisha, bivugwa ko yiciwe mu ntambara ihanganishije M23 n’ihuriro ry’ingabo zirwana ku ruhande rwa Leta ya Kinshasa.
Amakuru y’iyicwa rya Col Rugabisha, yemejwe ku wa Gatandatu taliki 01 Gashyantare 2025, binyujijwe mu itangazo ryashyuzwe hanze na Gen. Maj. Sylvain Ekenge usanzwe uvugira igisirikare cya RD Congo.
Amakuru avuga ko uyu musirikare wa FARDC, yiciwe mu Ntara ya Kivu y’Amajyaruguru mu gace k’ahitwa Mukwija.
Gen. Maj. Ekenge yavuze ko Col Rugabisha yishwe yari mu bikorwa bya gisirikare muri Teritwari ya Kalehe hafi ya Nyabibwe aho yari ayoboye ingabo za FARDC.
Icyakora avuga ko ingabo za FARDC zigije inyuma ingabo z’umutwe wa M23 kugeza mu bice bya Minova.
Ni mu gihe umutwe wa M23 uherutse kwigarurira Umujyi wa Goma n’ibindi bice byo mu Burasirazuba bwa Congo birimo Sake, Minova n’ibindi.
Umuhuzabikorwa w’ihuriro Alliance Fleuve Congo, AFC ryibumbiyemo imitwe ya politiki n’iyitwaje intwaro nka ARC/M23, Colonel Nangaa, aherutse gutangaza ko bafite gahunda yo gukomeza urugamba kugeza bafashe Kinshasa.
