Umutwe wa M23 ubarizwa mu ihuriro Alliance Fleuve Congo (AFC), wasohoye amashusho yerekana abantu bambaye imyambaro ya gisirikare n’abasivile, usobanura ko ari abo mu ngabo za Congo, FARDC.
Ayo mashusho yafashwe ku wa Kane taliki 26 Ukuboza 2024, Lt Col Willy Ngoma, uvugira umutwe wa M23/AFC, yavuze ko abafashwe ari abasirikare ba Congo, FARDC n’abo bafatanya barimo urubyiruko rwa Wazalendo n’abo muri FDLR.
Mu bafashwe barimo avari munsi y’imyaka y’ubukure, nk’umwe wo muri FDLR uvuga ko afite imyaka 13 y’amavuko.
Kugeza magingo aya uruhande rwa Leta ya Congo ntacyo ruravuga kuri bariya berekanywe, na bo ntabwo bahawe umwanya ngo bavuge imyirondoro yabo.
M23 isobanura ko bariya berekanwe, bafatiwe muri Teritwari ya Lubero ahitwa Alimbongo.
Ni kenshi umutwe wa M23 ugenda werekana ko hari abasirikare mu bo zihanganye na bo zafashe, kuko ziherutse kwerekana Abarundi bafatiwe mu mirwano.
Muri iki cyumweru, ingabo za Congo nazo zerekanye umusore wakomeretse zivuga ko ari umusirikare wafatiwe ku rugamba.
Uyu musore uvuga ko afite imyaka 22 y’amavuko amakuru yatanze yateje impaka, kuko ntiyavuze ibimuranga bya gisirikare, ndetse ntiyavuze n’abayobozi bamuyobora.
Igisirkare cy’u Rwanda kibinyujije ku rukuta rwa X yahozer cyamaganye ibivugwa, kivuga ko Iradukunda Jean de Dieu atari umusirikare wo mu ngabo z’u Rwanda.
Nta munsi n’umwe abarwanira muri Congo hagati ya M23 na FARDC hari bwabeho guhererekanya imfungwa z’intambara ku mugaragaro.
