Igisirikare cy’u Rwanda, RDF, cyemeje urupfu rw’umusirikare wo mu ngabo za Repubulika Iharanira Demokarasi ya Congo, FARDC, warasiwe mu Karere ka Rubavu.
Mu gihe cya Saa Saba n’iminota 10′ zo mu ijoro ryo kuri uyu wa Kabiri tariki 16 Mutarama 2024 nibwo abasirikare batatu ba FARDC binjiye mu Rwanda.
Umwe muri abo basirikare warashwe, yarashe ku bamuhagaritse, babiri bandi bahise bafatwa mpiri barimo Sgt. Asman Mupenda Termite w’imyaka 30 y’amavuko na Corporal Anyasaka Nkoi w’imyaka 28 y’amavuko.
Bafatiwe mu Murenge wa Rubavu, Akagari ka Rukoko ho mu Mudugudu wa Isangano bafatanwa imbunda imwe yo mu bwoko bwa AK-47, magazine enye zarimo amasasu 105.
Abo basirikare ba RDC bafatanywe kandi amasashe yarimo urumogi, bambaye n’ijire imwe ya Anti-balles.
Ubuyobozi bw’ingabo z’u Rwanda zo zatangaje ko nta wishwe cyangwa ngo akomeretswe ku ruhande rw’u Rwanda, buboneraho no kwizeza abaturage cyane cyane abatuye i Rubavu ko inkiko z’u Rwanda zirinzwe.
