Mu mpera z’icyumweru gishize umutwe wa M23 wigaruriye Umujyi wa Kibua wo mu Ntara ya Kivu y’Amajyaruguru, nyuma yo kuwirukanamo Ihuriro ry’ingabo zirwana ku ruhande rwa Leta ya Kinshasa.
Mu minsi yashize uyu Mujyi muto wa Kibua uherereye muri Teritwari ya Walikale, wahoze ari indiri y’abarwanyi b’umutwe wa FDLR urwanya ubutegetsi bw’u Rwanda.
Kibua yigaruriwe nyuma y’imirwano yo ku wa Gatandatu taliki 15 Werurwe 2025, yari ihanganishije ingabo za FARDC, Wazalendo na FDLR na M23.
Byitezwe ko ifatwa rya Kibua ryabaye urufunguzo rwa M23, ruyiganisha ku kwigarurira Zone ya Walikale, yahungiyemo ihuriro ry’ingabo za Leta ya Kinshasa nyuma yo kwirukanwa mu bice byo muri Teritwari ya Masisi.
Ku mugoroba wo ku Cyumweru hari amakuru avuga ko M23 iri mu bilometero bibarirwa muri 40 uvuye i Walikale ndetse no mu bibarirwa muri 80 uvuye mu yindi Centre y’ubucuruzi ikomeye yitwa Mubi.
