Mu bushakashatsi bwakozwe n’Urwego rw’igihugu rw’Imiyoborere myiza, RGB, hagamijwe kureba uko abaturage babona service bahabwa hibanzwe ku butabera, maze uturere tw’imigi twiharira imyanya ya nyuma haheruka Musanze, Nyamagabe iza iyoboye urutonde.
Ni ubushakashatsi bwibanze mu myaka ibiri, uwa 2022 na 2023, aho harebwe imikorere y’inkiko, inzego z’Abunzi, imikorere y’Urwego rw’igihugu rw’Ubugenzacyaha, RIB, n’ibindi byiciro.
RGB, yisunze imbuga nkoranyambaga zayo, yagaragaje uko uturere twagiye twitwara mu gutanga izi services.
Ni urutonde ruyobowe n’akarere ka Nyamagabe kakoze izamuka rigaragara, aho kazamutseho 15.4 %, mu myaka ibiri, mu mwaka wa 2022 Nyamagabe yari ku kigero cya 73.2 %, naho mu mwaka wa 2023 kagera ku kigero cya 88.6 %.
Ni urutonde rusozwa n’akarere ka Musanze, kuko kari ku mwanya wa nyuma gashyirwaho n’impuzandengo y’ijanisha rya 72.9 %, mu mwaka wa 2022, naho muri 2023 kagira 73.5 %.
Uturere 5 twa nyuma dukurikirana gutya:
26:Gatsibo
27:Ruhango
28:Kayonza
29:Kicukiro
30:Musanze
Imbonerahamwe igaragaza uko uturere twa nyuma duhagaze muri serivisi z’ubutabera mu myaka ibiri (2023-2022)
Naho mu myanya 5 ya mbere harimo:
1.Nyamagabe
2.Burera
3.Rusizi
4.Rubavu
5. Ngororero
Imbonerahamwe igaragaza uko uturere twa mbere duhagaze muri serivisi z’ubutabera mu myaka ibiri (2023-2022)
Ubu bushakashatsi bwa RGB, bugaragaza ko abaturage bashima services z’Abunzi ku kigero kirenga 85%.
Mu rwego rwo kunganira abatishoboye mu mategeko, ubu bushakashatsi bwa RGB, bugaragaza ko abaturage banyuzwe n’izi services ku kigero cya 79%, naho ku kurangiza imanza, bigashyirwa ku kigero cya 69.4 %.
Urwego rwo kurwanya ruswa n’akarengane ubu ruri ku gipimo cya 70%.
Muri izi nzego zose, urwego rw’Ubushinjacyaha bukuru ni rwo rurimo guhiga izindi ku kigero cya 92. 1%,naho inkiko ziza ku gipimo cya 89.5%, itangazamakuru riri ku ijanisha rya 88.7%.
Police y’u Rwanda iza ku gipimo cya 87.4%, Urwego rw’igihugu rw’ubugenzacyaha mu Rwanda, RIB, ruri ku gipimo cya 86.9%,Urwego rw’Umuvunyi 78.9%,naho inzego z’ibanze zikaba ziri ku gipimo cya 72.7%.
