Rutsiro: RIB yafunze umwana w’imyaka 13 ukekwaho gusambanya umwana w’imyaka 3

Mu Karere ka Rutsiro haravugwa inkuru y’umwana w’imyaka 13 y’amavuko wahinduriwe izina akitwa (Toto), watawe muri yombi akekwaho gusambanya umwana w’imyaka 3 y’amavuko.

Ibi byabaye mu masaha y’umugoroba wo ku wa 03 Kanama 2024, bibera mu Murenge wa Musasa mu Kagari ka Gisiza ho mu Mudugudu wa Karambi.

Mutabazi Thierry, Umunyamabanga Nshingwabikorwa w’Akagari ka Gisiza, yemeje aya makuru.

Yagize ati: “Twahawe amakuru n’ubuyobizi bw’Umudugudu wa Karambi ko uyu Toto yasambanyije umwana w’imyaka 3 y’amavuko, ubwo yari amusanze mu rugo kwa Hakizimana Frederick, uyu mwana yari yajyanye n’ababyeyi be mu bukwe.”

Uwo bikekwa ko yasambanyije yahise ijyanwa ku Bitaro bya Murunda kugira ngo akorerwe isuzuma.

Uyu wiswe Toto ukekwaho gusambanya uwo mwana, yahise atabwa muri yombi n’Urwego rw’Igihugu rw’Ubugenzacyaha (RIB) sitasiyo ya Ruhango.