Kuri uyu wa Mbere taliki 29 Nyakanga 2024, mu bice byinshi byo muri Teritwari ya Masisi hazindutse imirwano ikaze yari ihanganishije M23 n’ihuriro ry’ingabo zirwana ku ruhande rwa Leta ya Kinshasa, bivugwa ko iyo mirwano yagejeje mu masaha y’uyu mugoroba.
Kugeza mu gihe cya saa saba z’amanywa mu bice iyo mirwano yaberagamo hari hacyumvikana urusaku rw’imbunda nini n’intoya.
Uru rugamba rutari rworoshye, rwabereye mu duce tunyuranye duherereye muri Localité ya Kahira turimo ahitwa Tambi, Kasura na Bigogwe.
Amakuru avuga ko ibi bitero byagabwe n’Ingabo zirwana ku ruhande rwa Leta ya Kinshasa, ariko ngo M23 yirwanyeho birangira iri huriro rikijijwe n’amaguru.
Amakuru avuga ko kugeza ubu ibi bice byabereyemo imirwano biri kugenzurwa n’Ingabo za M23 ziyobowe na General Sultan Makenga, ndetse hari bamwe mu barwanyi be batangaje ko hari intwaro n’ibindi bikoresho bya gisirikare bambuye iri huriro rirwana ku ruhande rwa Leta ya Kinshasa.
Iyi mirwano yahuje impande zombi, yabaye mu gihe izi mpandi ziri mu gahenge k’iminsi 15 yasabwe na Leta Zunze Ubumwe za Amerika. Gusa n’ubwo iri huriro ariryo bivugwa ko ryabanje kugaba ibitero, Umuvugizi w’igisirikare cya FARDC, akoresheje imbuga nkoranyambaga yatangaje ko iyi mirwano yatangijwe na M23.
