Utavuga rumwe n’ubutegetsi bwa Perezida Antoine Felix Tshisekedi, Franck Diongo yavuze ko mu myaka itanu gusa Tshisekedi ari ku butegetsi amaze gushyira iki gihugu mu madeni kitigeze kugira.
Franck Diongo wo mu ishyaka rya MLP (Mouvement Lumumbiste Progressiste), ibi yabivuze mu ntangiro z’iki Cyumweru, mu kiganiro yagiranye n’abanyamakuru bo ku mugabane w’i Burayi, mu gihugu cy’u Bubiligi i Bruxelles.
Muri iki kiganiro Franck Diongo yavuze ko Perezida Tshisekedi yagiye ku butegetsi mu 2019, asanga igihugu gifite amadeni ya miliyari 3 z’amadorari y’Amerika, iri deni ni iryo ku bwa Joseph Kabila wayoboye RD Congo imyaka 18. Avuga ko kuva mu 2019 Tshisekedi agiye ku butegetsi iki gihugu gifite amadeni arenga miliyari 10 z’amadorari y’Amerika.
Yakomeje avuga ko mu myaka 32 Marshal Mobutu yayoboye RD Congo, yasize ifite amadeni ya miliyari 14 z’amadorari y’Amerika, avuga ko kandi yasize yubatse urugomero rwa Inga n’ibindi bikorwa by’indashyikirwa yakoreye muri iki gihugu.
Yavuze ko kandi ko kuva Tshisekedi yajya ku butegetsi, iki gihugu cyagize ubukene buri ku kigero cya 74,6%, anavuga ko amatora yo mu mwaka ushize yari yatsinzwe na Moise Katumbi.
Ati: “Sinemera ko Perezida Tshisekedi yaba yaratsinze Moise Katumbi mu matora y’ubushize. Umuntu ushyira igihugu mu kaga yari gutsinda gute? Ahubwo yibye amajwi.”
Ibi abivuze mu gihe ubwo Komiseri w’Umuryango w’Ubumwe bw’Uburayi aherutse kugirira uruzinduko i Goma, yatangaje ko ubutegetsi bwa Kinshasa nta mbaraga bushyira mu gushaka gushyira iherezo ku ntambara ibera mu Burasirazuba bw’iki gihugu.
