CECAFA Kagame Cup iteganyijwe guhera taliki 06-22 Nyakanga 2024 muri Tanzania na Zanzibar, yatumiwemo amakipe nka TP Mazembe yo muri Repubulika Iharanira Demokarasi ya Congo, Red Arrows yo muri Zambia na Nyasa Big Bullets FC yo muri Malawi.
Irushanwa CECAFA Kagame Cup ry’uyu mwaka, rizitabirwa n’amakipe 16 arimo atatu yatumiwe, nk’uko byatangajwe n’Impuzamashyirahamwe y’Umupira w’Amaguru muri Afurika y’Iburasirazuba no Hagati (CECAFA).
Umuyobozi Nshingwabikorwa wa CECAFA, John Auka Gecheo, yagize ati: “Iri rushanwa rizafasha amakipe yacu muri zone kwitegura neza mu ntangiriro z’umwaka w’imikino mbere y’uko CAF Champions League na CAF Confederation Cup ya 2024/2025 bitangira muri Kanama.”
Akomeza agira ati: “Kuba hazitabira amakipe akomeye yo muri Repubulika Iharanira Demokarasi ya Congo, Malawi na Zambia bizaryoshya irushanwa.”
Iri rushanwa ryatumye CECAFA y’Ibihugu yari iteganyijwe taliki ya 29 Kamena kugeza ku ya 14 Nyakanga isubikwa, rikazitabirwa kandi n’andi makipe 13 yo mu bihugu binyamuryango.
Amakipe azakina iri rushanwa ni APR FC (Rwanda), El Mereikh FC-Bentiu (Sudani y’Epfo), JKU SC (Zanzibar), SC Villa (Uganda), Gor Mahia FC (Kenya), Coastal Union FC, Azam FC, Young Africans SC na Simba SC (Tanzania), El Mereikh, Al Hilal, Hai El Wadi (Sudan), Vital’O (Burundi), Nyasa Big Bullets FC (Malawi), Red Arrows FC (Zambia) na TP Mazembe (RD Congo).
Iri rushanwa ubwo ryaherukaga kuba mu 2021, Express yo muri Uganda niyo yaryegukanye itsinze Nyasa Big Bullets FC yo muri Malawi igitego 1-0, icyo gihe yari yatumiwe muri iyo mikino yabereye muri Tanzania i Dar es Salaam.
