Abantu batandatu batawe muri yombi n’Urwego rw’Igihugu rw’Ubugenzacyaha, RIB, bakurikiranyweho icyaha cyo gushyira ahagaragara amashusho yerekeranye n’imikoreshereze y’ibitsina hokoreshejwe mudasobwa, icyaha cyo gukora ibiterasoni mu ruhame n’icyaha cyo gutukana mu ruhame.
Abatawe muri yombi barimo Mukamana Francine w’imyaka 24 y’amavuko, akaba akoresha shene ya YouTube izwi nka Fanny TV na Iradukunda Themistocles uzwi nka T. Bless w’imyaka 27 y’amavuko, ufite shene ya YouTube izwi nka Kigali Magazine.
Abandi bafashwe ni Gasore Pacifique uzwi nka Yaka Mwana w’imyaka 38 y’amavuko, Uwase Natasha w’imyaka 20 y’amavuko, Mugwaneza Christian w’imyaka 26 y’amavuko ufata amashusho anyuzwa kuri za shene za YouTube ndetse na Uwimana Jeannette uzwi nka Gaju w’imyaka 20 y’amavuko.
Aba bose batawe muri yombi ku wa 16 Mata no ku wa 06 Gicurasi 2024, bakaba bakurikiranyweho ibyaha bakoze mu bihe bitandukanye.
Dosiye ya Mukamana Francine na Uwase Natasha zamaze koherezwa mu Bushinjacyaha, abandi haracyakorwa iperereza mu gihe dosiye zabo ziri gutunganywa ngo zohorezwe mu Bushinjacyaha, bakaba bafungiye kuri sitasiyo ya RIB ya Nyamirambo.
