Ikipe ya Bugesera igeze ku mukino wa nyuma w’igikombe cy’Amahoro nyuma yo gutsinda Rayon sport ibitego 2-0 mu mikino 2.
Ikipe ya Bugesera yatsindiye Rayon Sport i Kigali kuri Kigali Pele Stadium, igitego 1-0 mu mukino ubanza.
Gusa mu mukino uheruka wa Shampiyona Rayon sport yahirikiye Bugesera mu manga igana mu cyiciro cya kabiri, ubwo ku italiki 20 Mata 2024 yayitsindaga 2-1.
Mu mukino wo kwishyura Rayon Sport byayisabaga kwigengesera kuko Bugesera yari ifite umujinya w’umuranduranzuzi yaje kurindimurira kuri Rayon sport ku munota wa 50, ubwo Stephen Bonney wa Bugesera yatsindaga igitego cyanaje no gutandukanya impande zombi, maze Rayon Sport isezererwa ityo mu gikombe cy’Amahoro ku bitego 2-0 mu mikino yombi.
Mu wundi mukino, Gasogi yari yatsinze Police FC 1-0, mu mukino ubanza, byayisabaga guhagarara ku gitego cyayo cyangwa ikongeramo ikindi, gusa byarangiye Police yishyuye igitego yatsinzwe, baranganya hanyuma basezerera Gasogi United kuri Penaliti.
Intsinzi ya Police ni impano bahaye umutoza Mashami Vincent kuko iyo aramuka asezerewe nawe yari guhita asezera kuko mu masezerano ye harimo gutwara nibura igikombe kimwe mu bikinirwa mu Rwanda bitaba ibyo akareba ahandi yerekeza.
Umukino wa nyuma w’igikombe cy’Amahoro uzahuza Bugesera na Police FC, Rayon Sport yisobanure na Gasogi ku mwanya wa Gatatu.
