Leta Zunze Ubumwe za Amerika zafatiye ibihano Perezida wa Zimbabwe, Emerson Mnangagwa, Umugore we, Auxillia Mnangagwa, Visi Perezida wa Zimbabwe, Constatino Chiwenga, Minisitiri w’ingabo, Ushinzwe iperereza, n’ushinzwe ubukungu mu ishyaka Zanu PF.
Abategetsi ba Zimbabwe bakubiswe ikinyafu, bashinjwa ibyaha birimo kubangamira uburenganzira bwa muntu, ruswa, kunyereza abantu, no guhohotera abantu bikabije.
Ibihano bafatiwe birimo gufatira imitungo yabo iri ku butaka bwa Leta Zunze ubumwe za Amerika ndetse no gukumira ingendo zose z’aba bategetsi zijya muri Leta zunze ubumwe za Amerika zitajyanye n’akazi.
Wally Adeyemo, ni umwungiriza wa Minisitiri w’Ubukungu wa Leta Zunze ubumwe za Amerika, yatangaje ko ibi bihano byafashwe mu rwego rwa gahunda ya Leta Zunze ubumwe za Amerika yo kurwanya ruswa n’akarengane ku isi.
Yasobanuye ko Leta zunze ubumwe za Amerika, mu gufatira ibihano aba bategetse ari mu rwego rwo kwerekana ko icyaha ari gatozi, aho akazu ka Perezida wa Zimbabwe n’abamwungiriza ndetse na ba rwiyemezamirimo, bakora ibyaha byinshi birimo kurya ruswa no guhohotera abaturage ba Zimbabwe.
Antony Blinken, ni Minisitiri wa Leta Zunze ubumwe za Amerika, ushinzwe ububanyi n’Amahanga, yavuze ko ibi bihano bishya, bije nyuma y’uko Zimbabwe yamunzwe na ruswa, akarengane, kwica inzirakarengane, kunyereza abantu, ruswa n’ibindi.
Mu gihe nta kintu ubutegetsi bwa Zimbabwe buratangaza kuri ibi bihano, Mnangagwa abaye Perezida wa Kabiri wa Zimbabwe ufatiwe ibi bihano nyuma ya nyakwigendera Robert Mugabe.
