Umufaransa Paul Labile Pogba, wakiniraga ikipe ya Juventus yo mu Butaliyani, yamaze guhanishwa imyaka ine atagaragara mu bikorwa by’umupira w’amaguru nyuma yo kugaragara ko akoresha ibiyobyabwenge.
Uyu mukinnyi w’imyaka 30 y’amavuko, yakiniye n’ikipe ya Manchester United, yapimwe mu kwezi kwa 8/2023, ubwo ikipe ya Juventus yakinaga na Udinese mu mukino ubanza wa Shampiyona y’umupira w’amaguru mu Butaliyani.
Nk’uko byatangajwe n’ikinyamakuru La Republica, cyo mu Butaliyani, umushinjacyaha ushinzwe kurwanya ibiyobyabwenge mu bakinnyi, ni we wasabiye Paul Pogba iki gihano, cyanamaze no kwemezwa.
Abasesenguzi bahamya ko Pogba ugenda usatira izabukuru mu mupira w’amaguru, bahamya ko ibi bishobora gushyira iherezo ku mupira wa Paul Pogba, nk’uwabigize umwuga, kuko mu kwezi gutaha kwa Werurwe 2024, azaba yujuje imyaka 31, bivuze ko yazarangiza igihano cye afite imyaka 35.
