Mu rwego rwo kwitegura imikino yo kwishyura ya shampiyona, ikipe ya Rayon Sports yazanye undi mukinnyi ukina ataha izamu ukomoka mu gihugu cya Senegal.
Uyu mukinnyi witwa Alon Paul Gomis, yageze i Kigali mu rukerera rw’uyu munsi ku wa 22 Ukuboza 2023, yakiriwe na Claude Ngendahimana uyobora abafana ba Rayon Sports n’Umuvugizi wayo Ngabo Robben.
Biteganyijwe ko uyu mwataka azashyira umukono ku masezerano nyuma yo gukorerwa isuzuma, nk’uko byemejwe n’iyi kipe ko batazongera gusinyisha umukinnyi batabanje gupima urwego ariho.
Uyu rutahizamu aje asanga umunya Guinée Alsény Camara Agogo wanatangiye imyitozo n’ubwo biteganyijwe ko azamara hanze y’ikibuga igihe cy’icyumweru kubera imvune yagiriye mu myitozo yo ku wa Kane tariki 21 Ukuboza 2023.
Rayon Sports umukino ubanza wo kwishyura izakina na Gasogi United. Rayon Sports muri shampiyona iri kumwanya wa Kane n’amanota 27 irushwa na APR FC iri ku mwanya wa mbere amanota 6.
