Umukinnyi wa APR FC ukina mu kibuga hagati Taddeo Lwanga, w’Umunya-Uganda yagize ibyago byo gupfusha se umubyara.
Aya makuru yemejwe n’ikipe akinira ya APR FC ibinyujije ku rubuga rwayo rwa X ishyiraho amagambo arimo ubutumwa bwihanganisha uyu mukinnyi.
Bagiraga bati: “Ubuyobozi bwa APR FC n’abafana bwihanganisha Taddeo Lwanga wapfushije se umubyara. Roho ye iruhukire mu mahoro.”
Taddeo Lwanga we abinyujije ku mbuga ze nkoranyambaga yavuze ko se umubyara, Vincent Mukasa, yazize uburwayi yari amaranye igihe, avuga ko yari amaze kubagwa inshuro eshanu mu mezi abiri ashize.
Kubera ibi byago Taddeo Lwanga yagize, hari amahirwe menshi ko atari bwifashishwe ku mukino iyi kipe ifite ku gicamunsi cy’uyu munsi iri bwesuranemo n’ikipe y’Amagaju mu mukino w’umunsi wa 15 wa shampiyona uri bubere kuri Stade Mpuzamahanga ya Huye.
