Mu Mudugudu wa Nyanza, Akagari ka Nyanza, Umurenge wa Busasamana mu Karere ka Nyanza niho hafatiwe umugore ukekwaho gucuruza urumogi.
Umuseke dukesha iyi nkuru wamenye ko inzego z’umutekano zirimo abasirikare bafatanyije na DASSO, bafata umugore witwa Mariam w’imyaka 31 y’amavuko na Elysee w’imyaka 31 y’amavuko bafatanywe urumogi bure (Boule) 84 n’amavuta atemewe.
Bivugwa ko uyu Mariam yari asanzwe acururiza mu Mujyi wa Nyanza, ibirimo amavuta, Colgate n’ibindi naho Elysee yari asanzwe ari umukarani.
Bizimana Egide, Umunyamabanga Nshingwabikorwa w’Umurenge wa Busasamana yatangaje ko abafashwe bafungiye kuri sitasiyo ya RIB ya Busasamana ndetse n’ibyo bafatanywe niho biri.
Amakuru avuga ko uyu mugore atari ubwambere afunzwe kuko yigeze gufungirwa mu kigo cy’inzererezi (transit center) amezi abiri azira gucuruza amavuta atukuza uruhu azwi nka mukorogo.
