Rutahizamu Cristiano Ronaldo akaba Kapiteni w’ikipe y’Igihugu ya Portugal n’ikipe ya Al Nassr muri Arabie Saoudité arasabirwa gukubitwa ibiboko 99 azira gusoma Umunya-Iranikazi.
Uyu mwaka muri Nzeri, ikipe Ronaldo akinira ya Al Nassr yagiye muri Iran mu irushanwa rya Champions League ya Aziya, Asia Champions League ubwo bahuraga n’ikipe ya Persepolis.
Muri urwo rugendo, Cristiano Ronaldo yahuye n’abafana be benshi, barimo n’Umunya-Iranikazi witwa Fatima Hamimi wari ufite n’impano y’ibishushanyo yari yageneye Ronaldo.
Uyu mugore ufite ubumuga bw’ingingo zidakora, ubwo yahuraga na CR7 barahuye baraganira aramuhobera ndetse anamusoma ku rutugu, ibintu bizira muri Iran, iyo ubikoze ku mugore utari uwawe.
Ibinyamakuru bitandukanye byo mu gihugu cya Iran biratangaza ko Abanyamategeko muri Iran batanze ikirego mu nkiko z’idini ya Isilamu basabira Ronaldo gukubitwa ibiboko 99 kuko azira guhobera no gusoma umugore w’abandi kandi kizira muri Iran no mu idini ya Isilamu.
Gusa aba banyamategeko bavuze ko uyu mukinnyi watwaye Ballon d’Or eshanu aramutse asabye imbabazi yababarirwa igihano kikavaho.
