Urwego rw’Igihugu rw’Ubugenzacyaha,RIB rwatangaje ko rwafunze abayobozi batatu bakurikiranyweho ibyaha bifitanye isano na ruswa ivugwa mu itangwa ry’amakosa ya Leta.
Abafashwe ni Mbyayingabo Athanase,na Nsabimana Cyprien, abanyamabanga Nshingwabikorwa b’Uturere twa Rusizi na Kirehe.
Undi muyobozi watawe muri yombi ni Rutikanga Joseph, umuyobozi mukuru ushinzwe imirimo Rusange mu Karere ka Nyamasheke.
RIB ivuga ko bakurikiranyweho gutanga amasoko ya Leta mu buryo bunyuranyuje n’amategeko. Bafungiye kuri sitasiyo za RIB za Kicukiro, Remera na Ruharambuga.
Bariya bayobozi bafashwe nyuma y’iperereza,RIB ivuga ko imaze iminsi ikora ku mitangire y’amasoko ya Leta mu Turere dutandukanye, kandi n’ubu ngo rirakomeje.
RIB iributsa abantu bafite gutanga amasoko mu nshingano zabo kujya bakurikiza amategeko,kuko kunyuranya na yo ari icyaha,kandi ko itazadohoka gukurikirana uwo ariwe wese uzagaragaraho ibikorwa nk’ibyo.
Bariya bayobozi” Bakurikiranyweho icyaha cyo gutanga isoko rya Leta mu buryo bunyuranyuje n’amategeko”.
Iki cyaha ugihamijwe n’urukiko ashobora guhabwa igihano cy’igifungo kuva ku myaka 5 ariko kitarenze imyaka 7, n’amafaranga y’u Rwanda kuva kuri miliyoni 2,000,000 Frw ariko kitarenze miliyoni 5,000,000 Frw.
Ivomo: umuseke
