Muri Repubulika Iharanira Demokarasi ya Congo Radiyo na Televiziyo by’igihugu byanyujijeho itangazo rivuga ko, Perezida Tshisekedi yageneye imidari y’inyenyeri za bronze abasirikare babiri bakuru nk’ishimwe ry’uko baburijemo igitero cyagerageje guhirika ubutegetsi bwa Kinshasa mu kwezi gushize.
Iri tangazo rirashimira abofisiye babiri mu ruhare rukomeye bagize mu kuburizamo igikorwa cyo guhirika ubutegetsi bwa Kinshasa cyageragejwe ku wa 19 Gicurasi 2024.
Iri tangazo ryatangajwe na leta rikomeza rivuga ko abagenewe iyi midari ari Colonel Muyebe Jim na Lit. Colonel Tshaka Kalambaye Dédé.
Iteka rya Perezida Tshisekedi ryasobanuye ko Colonel Muyebe Jim na Lit. Colonel Tshaka Kalambaye Dédé bagaragaje urukundo bafitiye igihugu, ubwo abitwaje intwaro bari bayobowe na Christian Malanga Musumari bateraga ingoro y’umukuru w’igihugu.
Icyo gihe abo bitwaje intwaro barenga 50 byagabye igitero no mu rugo rwa Vital Kamerhe wahoze ari Minisitiri w’Ubukungu, bahicira bamwe mu bapolisi barindaga urugo rwe. Vital Kamerhe kuri ubu ni Perezida w’Inteko Ishinga Amategeko ya RD Congo.
Gen Major Sylvain Ekenge, uvugira ingabo za RD Congo, yatangaje ko uwari uyoboye iki gitero Christian Malanga yishwe, abandi barenga 50 bakaba baratawe muri yombi. Abafashwe bose bafungiye muri Gereza ya Gisirikare ya Ndolo ndetse ni na ho bari kuburanishirizwa.
