Uwabaye Perezida wa Leta Zunze Ubumwe za Amerika, Donald Trump, yahamijwe ibyaha 34 akurikiranyweho bifitanye isano n’inyandiko mpimbano, ku mafaranga bivugwa ko yishyuye umugore bigeze kuryamana Stormy Daniels, kugira ngo atabuviga bikamubuza amahirwe yo gutsinda amatora mu 2016.
Ku wa Kane taliki 30 Gicurasi 2024, nibwo urubanza rwa Donald Trump rwakomeje, mu Rukiko rw’i Manhattan muri New York. Uru rubanza rwari rwanitabiriwe n’uyu mugabo ku gite cye.
Uru Rukiko rwatangaje ko Donald Trump ahamwa n’ibyaha 34 by’inyandiko mpimbano byose bifitanye isano n’amafaranga yishyuye Stormy Daniels ngo atazamuvamo nyuma y’uko bakoranye imibonano mpuzabitsina.
Perezida Donald Trump abaye umuntu wa mbere wabaye Perezida wa Amerika uhamijwe ibyaha n’Urukiko.
Ku wa 11 Nyakanga 2024 nibwo biteganyijwe ko Urukiko ruzatangaza ibihano rwafatiye uyu mugabo.
Donald Trump amaze igihe mu nkiko ashinjwa kwishyura Stormy Daniels $130,000 kugira ngo atavuga ko bagiranye umubano wihariye bakaza no gukorana imibonano mpuzabitsina.
Muri iki kirego Donald Trump yahamijwe guhimba inyandiko agamije guhishira ibyaha yakoze, akaba ashobora gukatirwa igihano kiri hejuru y’imyaka 100.
