Kuri uyu wa Kane taliki 23 Gicurasi 2024, Ubushinjacyaha bw’u Rwanda bwasabiye Barikana Eugène wahoze mu Nteko Ishinga Amategeko umutwe w’Abadepite, gufungwa imyaka ibiri nyuma yo gusanganwa intwaro mu rugo iwe.
Iri buranishwa ryabereye mu Rukiko rw’Ibanze rwa Nyarugenge, aho Barikana Eugène yaburanye yemera icyaha, agasaba gukurirwaho ibihano.
Ku wa Gatatu taliki 29 Gicurasi 2024, nibwo biteganyijwe ko hazasomwa icyemezo cy’Urukiko.
Taliki 11 Gicurasi 2024, nibwo Urwego rw’Igihugu rw’Ubugenzacyaha (RIB) rwafunze Barikana nyuma yo kwegura mu Nteko Ishinga Amategeko nk’Umudepite.
RIB ivuga ko Barikana yari akurikiranyweho gutunga intwaro mu buryo bunyuranyije n’amategeko.
Icyo gihe Barikana yasanganywe grenade imwe, na magazine imwe y’imbunda yo mu bwoko bwa AK (47).
Barikana yabwiye abagenzacyaha ba RIB ko “Intwaro yazitunze akibana n’abasirikare akibagirwa kuzisubiza.”
Iki cyaha naramuka agihamijwe n’Urukiko ashobora guhanishwa igifungo kuva ku mwaka umwe ariko kitarenze imyaka ibiri n’ihazabu y’amafaranga y’u Rwanda kuva kuri miliyoni imwe kugera kuri miliyoni ebyiri cyangwa kimwe gusa muri ibyo bihano.
