Myugariro wa Rayon Sports, Rwatubyaye Abdul, hagaragaye amafoto ari gukorera imyitozo mu ikipe ya FK Shkupi yo muri Macedonia ku mugabane w’i Burayi, hakaba hakomeje kwibazwa icyamuteye kugenda nta ruhushya rw’ikipe yakiniraga afite.
Rwatubyaye Abdul mu Cyumweru gishize yasangije abamukurikira ku rubuga rwe rwa Instagram amafoto ari gukorera imyitozo mu ikipe ya FK Shkupi yo muri Macedonia ku mugabane w’i Burayi.
Ni mu gihe uyu mukinnyi yari yavuye mu kibuga umukino utarangiye, ubwo Rayon Sports yari yahuye na Police FC mu mukino wa ½ w’irushanwa ryari ryabahuje ryo kwizihiza umunsi w’Intwari, icyo gihe Police FC isezerera Rayon Sports kuri za Penaliti 4-3.
Rwatubyaye abinyujije ku rukuta rwe rwa Instagram, yavuze ko yishimiye ko yagarutse ku mugabane w’i Burayi gusoza akazi ke atasoje mbere yo kuza muri Rayon Sports.
Haracyibazwa icyaba cyateye Rwatubyaye kujya mu ikipe ya FK Shkupi kandi yari agifite amasezerano y’amezi atandatu muri Rayon Sports.
Julien Mette, Umutoza mukuru wa Rayon Sports, abazwa ku kuba atari kumwe na Rwatubyaye, yavuze ko uko abantu babibonye ariko nabo babibonye batazi uko yageze i Burayi.
Ni ku nshuro ya kabiri uyu myugariro asubira mu ikipe ya FK Shkupi, mbere yo kugira ikibazo cy’imvune muri 2022 agasezererwa.
