Mu Karere ka Kicukiro mu Murenge wa Gahanga umusore ukekwaho ubujura yarashwe afatiwe muri kompanyi ya Real Contractors yari agiye kuhiba.
Uyu musore yarashwe mugitondo cyo kuri uyu wa Gatanu tariki 19/01/2024, mu Murenge wa Gahanga mu Kagari ka Barija ho mu Mudugudu wa Nyabigugu.
Real Contractors ni kompanyi ifite ibikorwa bitandukanye birimo ibyuma by’imodoka.
SP Twajamahoro Sylvestre, Umuvugizi wa Polisi mu Mujyi wa Kigali yatangaje ko iyi kompanyi atari ubwa mbere itewe n’abajura bagiye kuyiba.
Avuga ko aba bajura bari bitwaje amabuye na fers à béton bashatse gukubita abarinzi nyuma umwe muri ibyo bisambo akaraswa.
Yagize ati: “Bashaka kubakubita haza kuraswamo umwe abandi barirukanka.”
SP Twajamahoro yakomeje avuga ko abari bari kumwe n’uwarashwe birutse bakaburirwa irengero.
Ikindi yasabye Abanyarwanda gukomeza gutangira amakuru ku gihe, kandi bakamenya y’uko mu gihe bafite ikibazo bakwiye kujya biyambaza inzego z’umutekeno.
Ati: “Turabakangurira kugira nimero za Telefone z’ubuyobozi bw’aho batuye cyane cyane iza sitasiyo z’ahantu batuye kugira ngo igihe bagize ikibazo habeho gutanga amakuru mu buryo bwihuse.”
Polisi ivuga ko yatangiye iperereza mu Mujyi wa Kigali kugira ngo hamenyekane imyirondoro y’uwarashwe.
