Uwayezu Jean Fidèle, Perezida wa Rayon Sports, yateguje abafana ko uzagerageza kumukubita azisanga mu buruhikiro bw’ibitaro (Morgue).
Perezida Uwayezu yabitangaje ku wa Mbere tariki 15 Mutarama 2023, ubwo yagiranaga ikiganiro n’Itangazamakuru.
Ibi byatangajwe na Perezida w’iyi kipe nyuma y’umukino Rayon Sports yatsinzwe na Gasogi United 2-1, nyuma y’umukino bamwe mu bafana bagashaka gusagarira usanzwe ari Umunyamabanga Mukuru wa Rayon Sports Namenye Patrick.
Ku mpamvu zo kuba SG Namenye Patrick ariwe ushinzwe gusinyisha abakinnyi, ashinzwa kuba yarasinyishije abakinnyi badashoboye, abafana bakavuga ko ariwe nyirabayazana w’umusaruro mubi iyi kipe iri kugira.
Perezida Uwayezu, mu kiganiro n’abanyamakuru, yateguje umufana uzagerageza kumukubita ko azisanga mu buruhikiro bw’ibitaro (Morgue).
Yagize ati: “Gukubita Perezida Jean Fidèle na Patrick ngo ni uko ikipe itsinzwe mu kibuga? 1994 murayibuka? Indege yaraguye bica Abatutsi barenga miliyoni. None Rayon Sports kubera ko ngo yatsinzwe, bakazamuka ngo Jean Fidèle na SG ngo badukubite? muri Stade muri VIP?”
“Iyo bahansanga bakankubita! Nava aho njya kuri Polisi kuvuga ngo nakoze ibi kubera kwirwanaho (Self-defense) cyangwa ubushotoranyi (provocation). Ariko unkubise wahava ujya muri Morgue.”
Perezida Uwayezu yakomeje avuga ko igihe u Rwanda rugezemo bitumvikana ukuntu umuntu apanga gukubita undi ngo ni uko ikipe yatsinzwe.
Yavuze ko ibi biba nyuma y’uko ubuyobozi bw’ikipe bukora amanywa n’ijoro kugira ngo itere imbere.
Yongeye ati: “Buriya APR FC nitsindwa abafana bazajya gufata Col Richard Karasira bamukubite? Aba Gorilla bazazamuka bafate Hadji Mudaheranwa bakubite? Cyangwa aba Gasogi bafate KNC? Bazaze! Iki gihe muri Stade yo muri uru Rwanda? Turatsinzwe ngo urakubita Patrick?”
Uwayezu yavuze ko ibi byose biba byihishwe inyuma n’abahoze muri Rayon Sports bayitezamo umwuka mubi, kubera batakibona ‘injyawuro’ bayikuragamo.
Yavuze ko mu rwego rwo guteza umwiryane muri Gikundiro, abayihozemo birwa bategura amanama mu bice bitandukanye by’Igihugu.
Rayon Sports yatangiye imikino ya Shampiyona yo kwishyura itsindwa, iragaruka mu kibuga kuri uyu wa Kabiri tariki 16 Mutarama 2023, ikina na Interfoce FC mu mukino ubanza wa ⅛ w’Igikombe cy’Amahoro uri bubere kuri Kigali Pelé Stadium.
