Umukino wagombaga guhuza Marseille na Lyon zikina icyiciro cya mbere mu Bufaransa wasubitswe ku munota wa nyuma ugiye gutangira, kubera ko abafana b’ikipe yari iri mu rugo bateye amabuye imodoka y’umutoza Fabio Grosso utoza Lyon bakamukomeretsa.
Uyu mukino wagombaga guhuza aya makipe ku Cyumweru tariki 29 Ukwakira 2023, Saa 21:45′, ariko byatangajwe ko usubitswe habura iminota mike ngo utangire bitewe n’abafana ba Marseille bateye amabuye imodoka yari itwaye ikipe ya Lyon yerekezaga kuri Stade Vélodrome bagakomeretsa abarimo abatoza bayo.
Umutoza mukuru wa Lyon, Fabio Grosso n’umutoza umwungirije Raffaele Longo nibo bagezweho n’ibyatewe birabakomeretsa. Ku rundi ruhande ikipe ya Marseille yo yatangaje ko itishimiye ibikorwa bitemewe byabaye kandi bidakwiye kwihanganirwa.
Si aba batoza bakorewe urugomo gusa, kuko mbere y’uyu mukino abafana batandatu b’ikipe ya Lyon nabo baratezwe.
Lyon yumvaga yatangiza umukino ariko bakibona umutoza Grosso na Longo uburyo bakomeretse bahise bavuga ko abakinnyi batari mu mwuka wo gukina. Hagaragaye amashusho Grosso aryamye ku ngombyi batwaraho abarwayi, avirirana mu maso.
Uyu mukino wasubitswe kuri Stade hari hamaze kugera abafana ibihumbi 65 bari baje kureba uyu mukino.
Umutoza Grosso yageze mu ikipe ya Lyon muri Nzeri,uyu mwaka wa 2023, asimbuye umufaransa Laurent Blanc wari umaze kwirukanwa.
