Abafana barebaga umukino wari wahuje UPDF FC na Express FC zo mu gihugu cya Uganda bakubise umusifuzi wo ku ruhande bamugira intere.
Uyu mukino wabaye ku wa Gatanu tariki 27 Ukwakira 2023 muri shampiyona y’icyiciro cya mbere, Star Times Uganda Premier League wahuzaga ikipe y’igisirikare cya Uganda UPDF FC na Express FC.
Express FC yatsinze igitego hakiri kare cyane ariko umukino warangiye ari igitego 1-1 kuko UPDF FC yishyuye igitego umukino ugiye kurangira ku munota wa 80.
Umusifuzi wo ku ruhande, Fahad Sekayaba, umukino urangiye yakubiswe bikomeye n’abafana ba Express FC bamushinza guhengamira ku ruhande rw’ikipe y’igisirikare cya Uganda UPDF FC.
Ikinyamakuru, Pluse Sports Uganda, dukesha inkuru, gitangaza ko uyu musifuzi Fahad Sekayaba, yakubiswe akava amaraso mu mazuru, mu matwi no mu maso ku buryo yajyanywe kwa muganga avirirana.
Polisi yabaye hafi ita muri yombi bamwe mu bafana kuko bari barakaye bikabije bakamena n’imodoka y’abasifuzi.
Mu gihugu cya Uganda ibi si ubwambere bihabaye kuko n’umwaka ushize wa shampiyona, Ishyirahamwe ry’Umupira w’Amaguru, FUFA ryafatiye ibihano ikipe ebyiri zirimo Busoga United na SC Villa bazira ko abafana bazo bakubise abasifuzi.
