Mu ijoro ryo ku wa Gatatu tariki 25 Ukwakira 2023, abantu bagera kuri 22 bapfuye abandi benshi bakomerekera mu bwicanyi bwakorewe mu Mujyi wa Lewiston muri Leta ya Maine.
Ukekwaho ubu bwicanyi yitwa Robert Card ngo ari mu kigero cy’imyaka 40 y’amavuko, bivugwa ko yari afite imbunda nini agenda arasa abantu, kuri ubu Polisi iri kumuhigira kutamubura.
Kugeza ubu, abantu 22 nibo bamaze gutangazwa ko baguye muri ubu bwicanyi bwakozwe n’uwo mugizi wa nabi.
Ubwo bwicanyi bwabaye mu gihe cya Saa Mbili z’ijoro za Amerika, kuva bibaye Polisi yahise isaba abaturage gufunga imiryango bakoreramo ibikorwa byabo mu gihe uyu mugizi wa nabi ari gushakishwa.
Ubu bwicanyi bwakorewe mu Mujyi wa Lewiston n’ahandi hitwa Mollison Way n’ahari Schemengees Bar & Grille Restaurant, mu duce abantu bakunda kujya kuruhukiramo.
