Mu Karere ka Gakenke,umurenge wa Karambo mu Kigo cy’amashuri yisumbuye cya GS Kirebe TSS haravugwa umwuka utari mwiza mu bahakorera.
Aya makuru atangazwa na bamwe mu baturiye,abarerera n’abakorera muri iki kigo bavugako hari umwuka utari mwiza bakifuzako inzego zifite uburezi mu nshingano zabikurikirana.
Amakuru avugako muri iki kigo amasaha menshi ashira abarezi bari gukoreshwa inama zidashira ibi bakavugako bibangamiye ireme ry’uburezi kuko babura uko bigisha no gutegura amasomo.
Inshuro nyinshi bakunda kubona abanyeshuri batiga babaza bakabwirwako Ushinzwe amasomo abahoza mu nama za hato na hato doreko ngo akenshi bigera saa yine nta mwarimu arajya mu ishuri ngo bakunda kubwirwa ko baba bahabwa updates.
Ikindi kibazo kigaragara muri iri shuri ni uko hari abarimu bagiye bahabwa kwigisha amasomo atajyanye n’ibyo bize urugero twabwiwe ni umwarimu wize kwigisha ibijyanye n’indimi wahawe kwigisha imibare ariko ibi ngo bikaba bikorwa ku girango amahugurwa y’imibare bajya bahabwa azayabone.
Uwaganiriye n’itangazamakuru yavuzeko ibi babibonamo nk’ikibazo,rimwe na rimwe bikaba byazamo no gutonesha ngo kuko batiyumvisha ukuntu muri iki kigo hari abarimu bahabwa amasomo yo kwigisha abandi bakirirwa bicaye nta masomo bahawe kandi ukwezi gushira bose bakajya guhembwa.
Twashatse kumenya niba koko ibivugwa byaba ari ukuri cyane ko ushyirwa mu majwi ari Umuyobozi wungirije ushinzwe amasomo (DOS).
Mugabe Prosper, abajijwe ibivugwa niba ari ukuri ati:”Ntago ndi umuvugizi w’ikigo,ibyo ni ukubeshya”.
Ibi bikaba bisaba inzego bireba gukurikirana byimbitse iki kibazo bitazaba aka ya mvugo ngo “Aho inzovu zirwaniye,ibyatsi birahababarira”.
