Umusore uri mu kigero cy’imyaka 19, witwa Manirakoze Fidel yasanzwe mu kidendezi cy’amazi mu karere ka Musanze, Umurenge wa Shingiro, Akagari ka Kibuguzo ho mu Mumudugudu Mudende.
SP Mwiseneza Jean Bosco, Umuvugizi wa Polisi y’u Rwanda mu Ntara y’Amajyaruguru yemeje ko aya makuru ari yo.
Uyu musore ngo yoherejwe kuvoma mu masaha ya saa 18h00′ na nyina nuko aramutegereza aramubura, niko guhita ahuruza avuga ko yabuze umwana.
Abaturage ku bufatanye n’inzego z’umutekano bahise batangira igikorwa cyo gushaka uyu musore wari wabuze.
Umuvugizi wa Polisi y’u Rwanda mu Ntara y’Amajyaruguru, SP Mwiseneza Jean Bosco yagize ati “Aho byageze saa munani z’ijoro aba abonetse mu kidendezi cy’amazi hafi y’umugezi wa Susa.”
Umuvugizi wa Polisi mu Ntara y’Amajyaruguru yakomeje avuga ko hagiye gukorwa iperereza kugira ngo hamenyekane icyateye urupfu rwa Manirakoze.
Mbere yo gushyingura nyakwigendera, umurambo we wajyanywe ku bitaro bya Ruhengeri ngo ukorerwe isuzumwa.
SRC: Umuseke
