Muri Repubulika Iharanira Demokarasi ya Congo, haraturuka amakuru avuga ko umutwe wa M23 uri hafi kwigarurira Centre ya Walikale. Ni nyuma yo kwigarurira uduce turi hafi yayo.
Bivugwa ko mu mpera z’icyumweru gishize uyu mutwe wari wigaruriye Umujyi wa Kibua, mu gitondo cyo kuri uyu wa Mbere ukaba wigaruriye gace ka Mutakato.
Ni agace gaherereye mu bilometero bibarirwa muri 25 uvuye muri Centre ya Walikale.
Aka gace kigaruriwe n’abarwanyi ba M23 nyuma yo kuhirukana Ihuriro ry’ingabo zirwana ku ruhande rwa Leta ya Kinshasa.
Kuri ubu hari amakuru avuga ko, ingabo za Leta ya Congo zari zarahungiye muri iyi Centre ya Walikale ndetse na bamwe mu baturage bahise batangira guhunga berekeza mu mujyi wa Kisangani.
M23 yegereye Centre ya Walikale mu gihe habura amasaha make igahurira mu biganiro na Leta ya Kinshasa.
Ni ibiganiro biteganyijwe kubera i Luanda muri Angola kuri uyu wa Kabiri taliki 18 Werurwe 2025.
