Ubuyobozi bwa Kompanyi y’indege ya United Airlines, bwatangaje ko mu ipine ry’indege yabo habonetsemo umurambo w’umuntu, wabonetse ubwo indege yari ikigera ku kibuga cy’indege cya Maui muri Hawaii.
Mu ijoro rishyira ku italiki 25 Ukuboza 2024, nibwo iyo ndege yabonetsemo umurambo bitaramenyekana aho waturutse n’uko waba warageze mu ipine ry’iyo ndege ya ‘United Flight 202’, yavaga ku kibuga cy’indege cya ‘O’Hare Airport’ muri Chicago.
Hanyuma mu gihe yari igeze ku kibuga cy’indege cya ‘Kahului Airport’ biza kugaragara ko hari umurambo uri mu ipine yayo. Kugeze magingo aya ngo nta makuru araboneka yafasha mu kumenya uwo muntu wapfuye n’umwirondoro we.
Ubuyobozi bw’iyo kompanyi bwatangaje ko iyo ndege ngo yabanje gukora urugendo ruturuka ahitwa i Sao Paulo muri Brazil, nyuma ikora urundi rugendo rudahagarara rugana i Chicago, urugendo rwamaze amasaha ane n’igice. Nyuma ikora urugendo rudahagarara (direct flight) ruva kuri O’Hare airport rugana ahitwa Maui muri Hawaii.
Ikinyamakuru CBS News cyatangaje ko Kompanyi y’indege ya United Airlines, yavuze ko irimo gukorana n’inzego z’umutekano mu bijyanye n’iperereza rigamije kumenya umwirondoro w’uwo muntu n’uko yashoboye kugera mu ipine ry’iyo ndege ya Boeing 787-10.
Umuvugizi wa United Airlines, yasohoye itangazo rigira riti: “Iryo pine kuryinjiramo byashobokaga gusa ku muntu uri hanze y’indege. Kugeza ubu, ntibirasobanuka uko byagenze n’igihe byabereye kugira ngo umuntu ashobore kwinjira muri iryo pine.”
Polisi ya Maui, mu itangazo yasohoye yatangaje ko “Ishami rya Polisi ya Maui, ririmo gukora iperereza rikomeye rigamije kumenya uwo muntu wapfuye, wabonetse mu ipine ry’indege. Kugeza ubu, nta makuru menshi araboneka.”
