Maj Gen (Rtd) Richard Rutatina, wari umaze igihe akorwaho iperereza n’Urwego rw’Igihugu rw’Ubugenzacyaha, RIB ku byaha byo guha amabwiriza abakozi be, bagakubita uwari waraye mu nzu ye, yatawe muri yombi.
Uyu bivugwa ko yakubiswe yari yagiye gusura umukozi ukora mu rwuri (farm) rwa Maj Gen (Rtd) Rutatina, ruherereye mu Murenge wa Murindi mu Karere ka Kayonza.
Amakuru agera ku itangazamakuru avuga ko icyaha akurikiranyweho, yagikoze ku wa 27 Ugushyingo 2024.
Bivugwa ko Maj Gen (Rtd) Rutatina yahaye amabwiriza abakozi be, bagakubita uwo muntu wakubiswe.
Uwo wakubiswe bivugwa ko ari kugenda yoroherwa nk’uko amakuru aturuka mu bitaro yivurijemo abivuga.
Kuri uyu wa Gatanu taliki 06 Ukuboza 2024, dosiye ya Maj Gen (Rtd) Rutatina n’abakozi be 10, igomba gushyikirizwa Ubushinjacyaha.
RIB yasabye abaturarwanda kwirinda kwihanira cyane ko ari cyaha gihanwa n’amategeko, ahubwo bagirwa inama yo kujya biyambaza inzego zibishinzwe igihe bumva hari uwaba yabakoreye icyaha.
Gen Maj (Rtd) Rutatina yagiye mu kiruhuko cy:izabukuru mu 2016. Yigeze kuba Umuyobozi w’Urwego rw’Iperereza mu Ngabo z’u Rwanda, J2.
