Mu gihe hatangiraga imikino ya Shampiyona y’ingimbi, ikipe ya Rayon Sports yanyagiwe na APR FC ibitego 9-1, umutoza yiregura ko APR yakinishije abarengeje imyaka.
Ni umukino wabaye kuri iki cyumweru taliki 17 Ugushyingo 2024 kuri Kigali Pele Stadium.
Muri uyu mukino hatunzwe agatoki ku kuba harimo kubeshya imyaka cyane cyane hagendewe ku gikuriro abakinnyi ba APR FC bagaragazaga.
Mbungira Thomas, umutoza w’ingimbi za Rayon sport yatangaje ko imvano yo kwandagazwa bigeze aha byaturutse ko APR FC asanga yakinishije abakinnyi barengeje imyaka 17 isabwa.
Yavuze ko anejejwe n’uko ikipe ye yitwaye kuko asanga ntako abakinnyi be batagize, ahamya ko ikipe ikintu cyonyine yamurushije ari ubukuru, ko abana bakinnye n’ababaruta.
Uyu mutoza yanabikomozagaho ubwo umukino wabaga kuko yumvikanaga abwira abakinnyi gushyiramo agatege kuko barimo gukina n’abasaza, ibyo afata nko kuba yarimo abatera akanyabugabo bugihe yarimo anyagirwa imvura y’ibitego.
Yagize ati:”Nababwiraga kuguma mu mukino ndetse no gushyiramo imbaraga kuko bakinaga n’ababaruta gusa ntabwo mbitindaho kuko nabo bazakura bangane nabo.”
Gusa yahamije ko nta gahunda yo kubitangamo ikirego bafite.
Ku rundi ruhande, Ngabo Albert, umutoza wa APR FC y’ingimbi, yatangaje ko ikipe yatsinzwe yose itabura urwitwazo.
Ati:” Iyo umuntu agutsinze ntabwo wabura urwitwazo. Mbere yo gutangira shampiyona, buri kipe ijyana ibyangombwa muri FERWAFA, ubwo mu gitondo umutoza(wa Rayon sport), ajyane ikirego arebe ko bituzuye.”
Albert mu mvugo yuje agahinda, yunzemo ati:”Ahubwo ndababaye nagombaga kubatsinda ibitego 20.”
Iyi shampiyona y’ingimbi, zitarengeje imyaka 17,irimo gukinwa ku nshuro ya mbere, yitezweho ko izazamura impano z’abakiri bato mu Rwanda.
