Kuri uyu wa Kabiri taliki 29 Ukwakira 2024, Polisi y’u Rwanda, RNP, yatangaje ko mu minsi ishize Miss Muheto Divine yafashwe atwaye ikinyabiziga yanyoye ibisindisha birengeje igipimo, kandi nta ruhushya rwo gutwara ibinyabiziga agira.
Miss Muheto yanafashwe kandi yagonze anangiza ibikorwa remezo, hamwe no guhunga nyuma yo kugonga. Polisi yatangaje ko atari ubwa mbere yari abikoze.
RNP ibinyujije ku rukuta rwa X yagize iti: “Polisi iramenyesha ko Miss Muheto Divine yafashwe kubera gutwara ikinyabiziga yanyoye ibisindisha birengeje igipimo, kandi nta ruhushya rwo gutwara ibinyabiziga agira, kugonga no kwangiza ibikorwa remezo, hamwe no guhunga nyuma yo kugonga. Ibi ntabwo ari ubwa mbere yari abikoze.”
RNP bongeyeho ko Miss Muheto yamaze gukorerwa dosiye igashyikirizwa ubushinjacyaha.
Muri Nzeri 2023 nabwo Miss Muheto yakoze impanuka, imusigira ibikomere bidakanganye ariko imodoka ye yangirika ku buryo bukomeye.
Nshuti Divine Muheto yabaye Nyampinga w’u Rwanda mu 2022, asimbuye Miss Rwanda 2021, Ingabire Grace.
