Neymar yabwiye Abanya-Brésil bakinana na Mbappé muri Real Madrid uko bagomba kumwitwaraho

Umunya-Brésil Neymar Jr yabwiye benewabo basangiye igihugu bakina mu ikipe ya Real Madrid ko gukinana na rutahizamu Kylian Mbappé ari nko kuba ikuzimu.

Umunyamakuru Cyril Hanouna mu kiganiro yagiranye na Europe 1 yavuze ko Neymar yandikiye bagenzi be b’Abanya-Brésil ababurira ku gukinana na Mbappé.

Ati: “Bariya bakinnyi (bo muri Real Madrid) ni inshuti za Neymar. Yabandikiye urupapuro ababwira uko bagomba kwitwara avuga ko gukinana na Mbappé ari ishyano ari nko kuba ikuzimu.”

Abakinnyi bakinana na Mbappé muri Real Madrid b’Abanya-Brésil ni Vinicius Jr, Rodrygo, Endrick na Éder Militão.

Mu mpeshyi uyu mwaka nibwo Mbappé yerekeje muri Real Madrid ndetse ari kugenda amenyera kuko amaze gutsinda ibitego bine mu mikino itandatu amaze gukinira iyi kipe.

N’ubwo Neymar avuga ibi, nta kibazo kiragaragara hagati y’impande zombi, kuko ku mukino uheruka guhuza Real Madrid na Real Sociedad, Vinicius yakorewe penaliti ayiha Mbappé ngo ayitere, ndetse aba bakinnyi akenshi bagaragaye bishimira igitego mu buryo busanzwe bumenyerewe kuri Mbappé.

Kugeza ku munsi wa Gatanu wa Shampiyona ya Espagne, Real Madrid iri ku mwanya wa Gatatu n’amanota 11 aho irushwa amanota ane na FC Barcelona iri ku mwanya wa Mbere.