Kuri uyu wa Gatatu taliki 11 Nzeri 2024, muri Repubulika Iharanira Demokarasi ya Congo, muri Teritwari ya Rutshuru, Sheferi ya Bwito muri Gurupoma ya Bukombo ahitwa Kizimba, imirwano ikakaye yongeye kubura hagati ya M23 n’Abawazalendo bo mu mutwe wa CMC.
Kivu Morning Post yatangaje ko imirwano yiganje mu Midugudu ya Sisa, Rubona n’ahandi mu birometero nka bine uvuye muri Kizimba. Ni mu gihe indi mirwano ivugwa i Masisi ihanganishije M23 n’ihuriro ry’ingabo zirwana ku ruhande rwa Leta ya Congo.
Umuturage wa Kizimba aganira n’itangazamakuru yagize ati: “Iturika ry’intwaro ziremereye muri iki gice ryateye ibwoba mu isantere ya Kizimba. Nubwo hari imirwano, ituze riragaragara muri iki gice.”
Ni nako kandi havuzwe indi mirwano itagize ikindi yangiza yabaye mu gihe cya saa kumi n’imwe za mugitondo, yabereye muri Centre ya Bishusha no mu nkengero za Gurupoma ya Bukombo.
Ntabwo haratangazwa ibyangijwe n’uku kurasana, gusa bivugwa ko mu bice bya Bukombo ibikorwa by’abaturage n’urujya n’uruza byabaye bihagaze.
Ahandi havugwa imirwano ihanganishije M23 na FARDC ni muri Teritwari ya Masisi, muri Gurupoma ya Kibabi, aho bivugwa ko kuva mu masaha y’igitondo hari kuba imirwano mu Burengerazuba bw’Umujyi wa Rubaya, ku dusozi twa Kabingo na Rutingita.
