Biravugwa ko muri Repubulika Iharanira Demokarasi ya Congo hongeye kubura imirwano ihanganishije M23 n’ihuriro ry’ingabo za FARDC.
Amakuru avuga ko impande zombi zakozanyijeho mu masaha y’igicamunsi cyo ku wa Gatatu taliki 14 Kanama uyu mwaka.
Iyi mirwano yabereye mu Ntara ya Kivu y’Amajyaruguru, Teritwari ya Rutshuru mu gace gaherereye muri Gurupoma ya Binza.
Amakuru avuga ko FARDC ariyo yagabye ibi bitero kuri M23, ishaka kwigarurira kariya gace kamaze ibyumweru bitatu kagenzurwa n’abarwanyi b’umtwe wa M23.
FARDC ntiyahiriwe n’iyo mirwano kuko ngo yakubiswe umugenda, ikanamburwa na bimwe mu bikoresho bya gisirikare.
Si ubwa mbere Gurupoma ya Binza ibereyemo imirwano ikakaye ihanganishije M23 n’ihuriro ry’ingabo zirwana ku ruhande rwa Leta ya Kinshasa.
Ni mu gihe FARDC ishinjwa guhengera impande zombi ziri mu gihe cy’agahenge, ikagaba ibitero ku birindiro bitandukanye bya M23 ishaka kugirango iyambure tumwe mu duce igenzura.
