Misfer bin Faisal Mubarak Al-Ajab Al-Shahwani, Ambasaderi wari uhagarariye Qatar mu Rwanda, yitabye Imana.
Ku wa Gatanu taliki 19 Nyakanga 2024, nibwo amakuru y’urupfu rwe yatangajwe na Minisitiri w’Intebe akaba n’uw’Ububanyi n’Amahanga wa Qatar, Mohammed bin Abdulrahman Al-Than.
Minisitiri w’Intebe abinyujije ku rukuta rwe rwa X, yagize ati: “Twihanganishije twebwe ubwacu n’imiryango ya nyakwigendera Misfer bin Faisal Al Shahwani, wari Ambasaderi wa Leta ya Qatar mu Rwanda, witabye Imana uyu munsi.”
Arongera ati: “Turasaba Imana Isumbabyose kumwakira no kumubabarira ndetse no gukomeza umuryango we n’abamukundaga bose ibahe kwihangana n’ihumure.”
Ntiharatangazwa icyo Ambasaderi Misfer bin Faisal Mubarak Al-Ajab Al-Shahwani yazize ndetse n’andi makuru ajyanye n’urupfu rwe ntaratangazwa.
Ambasaderi Misfer Al-Shahwani yatangiye inshingano ze i Kigali mu Ukwakira 2021 kugeza muri uku kwezi kwa Nyakanga 2024 yapfiriyemo.
