Ibikorwa bya Joe Biden byakomwe mu nkokora no kuba yanduye COVID-19

Ibiro bya Perezida wa Leta Zunze Ubumwe za Amerika (White House) byatangaje ko ku wa 17 Nyakanga 2024, Perezida Joe Biden yapimwe bagasanga yaranduye COVID-19.

Perezida Joe Biden ubwo yari mu bikorwa byo kwiyamamaza muri Las Vegas, aho yaniteguraga gutanga ijambo mu nama ngarukamwaka ya UnidosUS, yagaragaweho n’ibimenyetso bya Covid, bamupimye barayimusangana.

Umuganga uvura Biden yavuze ko yahawe dose ya mbere y’umuti wa Paxlovid, hanyuma akaba agiye gushyirwa mu kato mu rugo rwe muri Rehoboth Beach, Delaware nk’uko biteganywa n’ikigo cya Leta ya Amerika gishinzwe gukumira ibyorezo.

Karine Jean Pierre, Umunyamabanga ushinzwe itangazamakuru muri White House, yavuze ko ubutumwa bw’umuganga bwagaragaje ko “Perezida yagaragaje ibimenyetso byo guhumekera hejuru, birimo gusohoka kw’amazi yo mu mazuru kwa hato na hato, agakorora kadashira ndetse no kumva atameze neza muri rusange.”

Karine akomeza agira ati: “Yari ameze neza mu gihe cy’igikorwa cya mbere yakoze, ariko nyuma kuko yumvise atameze neza, byabaye ngombwa ko apimwa COVID-19, hanyuma ibisubizo bigaragaza ko afite iyo Virus.”

Iki cyorezo cyatumye Biden atitabira inama yari yatumiwemo ya UnidosUS, kuko agiye kumara iminsi irindwi ari mu rugo iwe yitabwaho n’abaganga.