Mu gitondo cyo kuri uyu Gatanu taliki 28 Kamena 2024, ingabo ziyobowe na Gen Sultan Makenga zigaruriye uduce tubiri two muri Teritwari ya Lubero mu Ntara ya Kivu y’Amajyaruguru.
Uduce twafashwe n’Ingabo za M23 ni agace ka Kimaka kafashwe mu gitondo cy’uyu munsi, n’agace ka Miriki ko zagezemo kuva mu masaha y’umugoroba w’ejo hashize, ariko zifata agace gato uyu munsi birangira kose ikigaruriye.
Andi makuru avuga ko imirwano ihanganishije M23 na FARDC n’abambari bayo, yaramutse ihanganishije impande zombi muri Centre ya Kanyabayonga.
Biravugwa ko kandi iyi mirwano iri gusatira muri Centre ya Kanyabayonga, ifite ubutaka bumwe bukora muri Teritwari ya Rutshuru ubundi muri Teritwari ya Lubero.
Biranavugwa ko Ingabo zirwana ku ruhande rwa Leta ya Kinshasa zaba zamaze kuva muri iyi Centre ya Kanyabayonga, mu gihe hari andi makuru avuga M23 yaba yamaze kwigarurira uduce twose two muri iyi Centre y’ingenzi muri Teritwari ya Lubero.
Ku rundi ruhande biravugwa ko imirwano ihanganishije M23 na FARDC mu bice bya Centre ya Masisi nk’ahitwa Remeka no mu nkengero z’aka gace.
Kuri ubu biravugwa ko mu bice biri kuberamo imirwano hazindutse urusaku rw’imbunda ziremereye n’into, kugeza magingo aya urwo rusaku ruracyumvikana.
Kubera imirwano ikakaye ihanganishije impande zombi, abaturage bari guhunga ku bwinshi bahungira mu duce tutari kuberamo imirwano.
