Mu ijoro ryakeye ryo ku wa Gatandatu taliki 01 Kamena 2024 hari hategerejwe umukino wanyuma wa UEFA Champions League, wahuje Borrussia Dortmund yo mu gihugu cy’u Budage na Real Madrid yo mu gihugu cya Esipanye.
Uyu mukino wari utegerejwe na benshi rero warangiye n’ubusanzwe Real Madrid imenyerewe ku gutwara iki gikombe itsinze Borrussia Dortmund ibitego 2-0.
Real Madrid gutwara igikombe byongeye kuyihesha ishema ariko mu ruhande rwa Borrussia Dortmund byari inyungu gutsindwa uyu mukino kurusha uko yari butsinde igatwara igikombe.
Ubusanzwe ikipe itwaye igikombe cy’irushanwa rya UEFA Champions League, yegukana iki gikombe gihatse ibindi ku mugabane w’i Burayi, cyigaherekeshwa n’amafaranga agera kuri miliyoni 20 z’ama euro (miliyoni 20 $) yiyongera ku yo iba yaragiye ibona uko irenze buri cyiciro uhereye mu matsinda.
Ikipe yageze ku mukino wanyuma yo igatsindirwayo, ihabwa agera kuri miliyoni 15.5 z’ama euro (miliyoni 15.5 $) nk’ikipe yabaye iya kabiri, na yo yiyongera ku yo iba yaragiye ibona uko irenze buri cyiciro uhereye mu matsinda.
N’ubwo buri kipe iba yifuza gutsinda ku mukino wanyuma kugira ngo yegukane igikombe, Borrussia Dortmund yo gutsindwa ku mukino wanyuma byatumye ibona amafaranga menshi ugereranyije n’ayo yari bubone ubwo yari bwegukane igikombe.
Uti: “gute rero?”, ibi byaturutse ku masezerano y’ubugure Real Madrid yagiranye na Borrussia Dortmund ubwo yaguraga Jude Bellingham, mu ntangiriro z’uyu mwaka w’imikino, ibi byatangajwe n’Ikinyamakuru Bild cyo mu Budage.
Ku ikubitiro Real Madrid yishyuye miliyoni 88.5$ kuri Jude Bellingham iyishyuye Borrussia Dortmund yakinagamo birumvukina, ariko mu masezerano harimo ko uyu mukinnyi naramuka atwaye UEFA Champions League, Real Madrid izongera Borrussia Dortmund miliyoni 5 z’ama euro n’andi miliyoni 2 z’ama euro mu gihe yashyirwa mu ikipe y’umwaka y’irushanwa.
Kuko Borrussia Dortmund yatsindiwe ku mukino wanyuma, ibyo bisobanuye ko yatahanye miliyoni 22.5 z’ama euro mu gihe iyo itwara igikombe yari butahane 20 z’ama euro gusa.
Jude Bellingham mbere yo guhura na Borrussia Dortmund yahoze akinira yari yatangaje ko ari bukore uko ashoboye bagatahukana igikombe nk’uko byagenze.
