Umuryango uharanira uburenganzira bwa muntu (Humana Rights Watch, HRW), wasabye ko habaho iperereza ku bwicanyi bwakurikiye kudeta (coup d’etat) yaburijwemo muri Repubulika Iharanira Demokarasi ya Congo i Kinshasa.
Ibiro Ntaramakuru by’Abafaransa, AFP, byatangaje ko HRW isaba inzego za Leta ya Congo gukora iperereza ku bwicanyi burimo kwihanira ku bagerageje guhirika ubutegetsi bw’i Kinshasa muri Congo ku wa 19 Gicurasi 2024.
Icyo gihe, abitwaje intwaro mbere yo kwerekeza hafi y’ingoro ya perezida, aho Felix Tshisekedi akorera mu murwa mukuru i Kinshasa, babanje gutera urugo rwa Minisitiri w’Ubukungu.
AFP ivuga ko abantu bagera kuri bane bishwe abandi mirongo ine batabwa muri yombi. Iyo kudeta yayobowe na Christian Malanga, umunyekongo ufite ubwenegihugu bw’Amerika, uri mu bishwe n’ingabo zishinzwe umutekano.
HRW ivuga ko “Ingabo zishinzwe mutekano zishe Malanga, mu buryo budasobanutse. Ivuga kandi ko yabonye videwo yafashwe n’abasirikare ba Congo yerekana abavugwaho kuba baragize uruhare muri kudeta.”
AFP yatangaje ko abo barundanywa bakarasirwa hafi y’ingoro y’igihugu.
