Umujyi wa Kigali, Akarere ka Gasabo, Umurenge wa Ndera, abanyamuryango ba Koperative KOPAKA RUSORORO baratabaza inzego zirimo Umujyi wa Kigali kubera kwamburwa n’abantu batazwi ku ngufu ubutaka batijwe n’umujyi wa Kigali.
Aba banyamuryango bari kwamburwa ubutaka mu gihe bafitemo imyaka nyuma yo guterwa inkunga n’Umujyi wa Kigali ingana na miliyoni ebyiri n’ibihumbi mirongo itanu na birindwi(2,057,000frw).
Ibi byatangiye ubwo abagabo baje bagatera imbibi mu butaka. Igiteye urujijo ni uko batigeze babimenyeshwa n’Ubuyobozi ko baba barambuwe ubutaka.Ubu butaka bukora mu mirenge ibiri Ndera na Rusororo.
Aba babambura ubutaka ngo baza rwihishwa ndetse amakuru agera k’ Umurunga avuga ko bamaze kuza inshuro eshatu. Kuwa Kabiri tariki ya 14 Gicurasi 2024 bari bamenyesheje Koperative ko baza gutera imbibi(Borne).
Perezida wa Koperative KOPAKA RUSORORO Bwana HAGENIMANA Modeste aganira n’Umurunga yavuze ko bashaka kubatwara ubutaka batijwe n’Umujyi wa Kigali nyamara bari bamaze guhabwa inkunga yo kwivana mu bukene bayishora mu buhinzi.
Yagize ati;”Turasaba ubuyobozi ko bakurikirana tukamenya aho baturuka kuko ubuyobozi bushima ibyo dukora ntibwigeze buduhagarika natwe dushima imikoranire n’inkunga badutera turasaba ko badufasha tugakora twisanzuye nk’uko bisanzwe.”
Amakuru umurunga wamenye ni uko umuyobozi ushinzwe ubuhinzi mu Murenge wa Rusororo Bwana NKURAYIJA Emmanuel yabwiye bamwe mu banyamuryango ko araza gutera imbibi(Borne) ku butaka bwatijwe Koperative KOPAKA-RUSORORO.
Umurunga wagerageje kuvugisha uyu NKURAYIJA Emmanuel ntibyakunda ati;”Ntabwo ndi umuvugizi w’umurenge.”
Umunyamabanga Nshingwabikorwa w’Umurenge wa Ndera Bwana Nkusi Fabien aganira n’Umurunga yavuze ko niba Umujyi wa Kigali wari warabatije uramutse utije abandi batakagize ikibazo.
Yongeyeho ko Koperative yabimenyeshejwe.
Ati:”Nyiri ubutaka yari yarabatije none niba yatije undi ikibazo ni ikihe ko ubutaka atari ubwabo nyirabwo ashobora gutiza undi?”
Yongeyeho ko bagana ubuyobozi “Tukamenya ikibazo tukababariza ababishinzwe.”
Gilbert IFASHABAYO Umurunga.com I Kigali
