Kenya: Yahagaritse ingendo z’indege zayo i Kinshasa

Kubera gufungwa kunyuranyije amategeko kw’abakozi babiri ba Kompanyi y’indege ya Kenya Airways (KQ) bafunzwe n’ubutasi bwa gisirikare bwa RD Congo, iyi Kompanyi yafunze ingendo zerekeza mu Murwa mukuru wa Repubulika ya Demokarasi ya Congo Kinshasa.

KQ mu itangazo yanyujije ku rubuga rwayo rwa X yavuze ko “idashoboye gukora izi ngendo neza nta bakozi.”

Iyi Kompanyi yavuze ko uku guhagarika ingendo zererekeza i Kinshasa, gutangira kuri uyu wa Kabiri taliki 30 Mata 2024.

KQ ivuga ko ku wa 19 Mata 2024, abakozi babiri bayo bafunzwe n’urwego rw’ubutasi bwa gisirikare rwa RD Congo, ruzwi nka DEMIAP (Détection Militaire des Activités Anti-Patrie), ngo bafunzwe kubera ibura ry’ibyangombwa byo kuri gasutamo ku muzigo w’agaciro kenshi.

Mu gihe umuyobozi wa KQ we avuga ko “uwo muzigo uvugwa ntiwapakiwe cyangwa ngo wemererwe na KQ kubera ibyongombwa bituzuye.”

Muri uko gutabwa muri yombi, telefone z’abo bakozi zarafatiriwe ndetse ntibemererwa gusurwa n’umuntu n’umwe, kugeza ubwo baje kwemererwa gusurwa ku wa 23 Mata 2024 nabwo basurwa n’abategetsi bo muri ambasade ya Kenya i Kinshasa hamwe n’itsinda rya KQ.

Iyi Kompanyi ya KQ yo yasabye igisirikare cya RD Congo kurekura abakozi bayo bagasubira mu miryango yabo.

Kuva ibi byatangazwa Leta ya Kinshasa ntacyo aribivugaho.